ESQUERDA UNIDA RECLAMA A CONSTITUCIÓN DO CONSELLO SECTORIAL DA XUVENTUDE

O GRUPO MUNICIPAL DE ESQUERDA UNIDA RECLAMA A CONSTITUCIÓN DO CONSELLO SECTORIAL DA XUVENTUDE

“A ASUNCIÓN DE MAIORES COTAS DE RESPONSABILIDADE E AUTONOMÍA EN RELACIÓN COA VIDA CIDADÁ, O SEU EMPODERAMENTO SOCIAL REQUIREN O FOMENTO DA PARTICIPACIÓN DA XENTE MOZA,” AFIRMA JAVIER GALÁN

O Grupo Municipal de Esquerda Unida reclama a constitución do Consello Municipal da Xuventude ao obxecto de fomentar dende os poderes públicos os procesos de asunción de responsabilidades e involucración na vida cidadá dun sector da nosa sociedade ao que as autoridades municipais adoitan deixar de lado. Aea de Xuventude de EU achegou esta demanda para abrir un espazo social de participación e protagonismo social da xente moza.

Javier Galán afirma a necesidade xeral de avanzar nos procesos de participación cidadá e, xa que logo, un elemento aínda pendente é a constitución do Consello Municipal da Xuventude. Esta reclamación que efectúa Esquerda Unida cobra maior actualidade e importancia diante do xeralizado proceso de deslexitimación das canles tradicionais de representación que se está a experimentar na sociedade e moi en particular entre a xente moza.

Esquerda Unida considera entón necesario abordar unha programación participada que atenda ás necesidades, moitas e apremiantes, da xente moza e un elemento clave para acometer esta tarefa é a creación dun espazo de análise, participación e toma de decisións, quen de fomentar o empoderamento social da xuventude. Non outra é a responsabilidade a desenvolver neste órgano que demandamos.

As persoas que hoxe se atopan no furco de idade moza teñen que de xeito compartido aprender a producir e organizar unha sociedade diferente e mellor. Esquerda Unida está certa que o farán e para iso fan falla ferramentas como a que hoxe demanda este Grupo Municipal.